АРЧА-БЕШИКТЕ ЖАҢЫ БАЛА БАКЧА

Арча-Бешик жаңы конушунда жаңы бала бакча курулуп жатат. Эки кабаттуу имараттын курулушу 90 пайыз бүткөрүлүп калды.

Бишкек мэриясынын капиталдык курулуш башкармалыгы билдирген маалымат боюнча бала бакча 180 орундук, анын жалпы аянты – 1889,3 чарчы метрди түзөт.

Арча-Бешик жаңы конушу эсиңиздерде болсо, эң алгачкы жана эң чоң жаңы конуштардын бири. Абасы таза тоолуу аймакка чукул болгондуктан, жаңы конуштун аянты түштүктү карай улам созулуп кеңейип баратканын байкоого болот, ошого жараша калктын саны жана балдардын саны көбөйүүдө.

Эмнеси болсо да, жаңы бала бакчанын курулуп жатканы жакшы көрүнүш. Бала бакчанын ичи жана айланасы жасалгаланып бүтсө, жакынкы арада балдар үнү жаңыра баштайт.

А.К.