АГАРТУУ МИНИСТРИ «ТУНГУЧ» ОНЛАЙН-МЕКТЕБИНИН ӨНҮГҮҮСҮН ТАЛКУУЛАДЫ

2026-жылдын 19-январында Кыргыз Республикасынын агартуу министри Догдуркүл Кендирбаева орун басарлары жана «Тунгуч» онлайн-мектебинин директору Айсулуу Жамангулова менен кеңешме өткөрдү.

Жолугушуунун жүрүшүндө онлайн-мектептин учурдагы ишмердүүлүгү жана өнүгүү багыттары боюнча маселелер талкууланды.

Мектеп директорунун айтымында, бүгүнкү күндө иш алып баруунун логикасы кайра каралып, предметтер боюнча маршруттук барактар жаңыланды, онлайн сабактарды жаздыруу үчүн жабдуулар орнотулууда.

Министр онлайн-мектептин негизги максаты ден соолугуна же башка себептерге байланыштуу кадимки мектепке бара албай калган окуучуларды сапаттуу билим менен камсыз кылуу экенин белгиледи.

Кеңешменин жыйынтыгында министр онлайн-мектептин ишин мындан ары өркүндөтүүгө багытталган бир катар тапшырмаларды жана сунуштарды берди.