МЕКТЕП РЭКЕТИН СЫНДАГАН ДРАМА

2025-жылдын 28-февралында Аксы районундагы А.Алымов атындагы маданият үйүндө учурдун эң көйгөйлүү маселеси болгон мектеп окуучуларынын арасындагы зордук-зомбулукка, рэкетчиликке бөгөт коюуну максат кылган орчундуу иш-чара болуп өттү.

Тактап айтканда, Барпы атындагы Жалал-Абад облустук кыргыз драма театрынын чыгармачыл жамааты Курманбек Ниязовдун “Кыйылган ѳмүр” социалдык драмасын Кербен шаарындагы мектеп окуучуларына кѳрсѳттү. Ага Аксы райондук мамлекеттик администрациясынын башчысы- акими З.Сыдыков, райондун прокурору М.Сооронкулов, райондук ички иштер бѳлүмүнүн башчысынын орун басары кызматкерлери менен, райондук билим берүү бѳлүмүнүн башчысынын орун басары кызматкерлери менен, ата-энелер, мугалимдер катышты. «Миң уккандан бир көргөн артык» дегендей, окуучулар кылмыштын акыры өкүнүч экендигин өз көздөрү менен көрүп, алардын таасирленгендиктери көз карашынан байкалып турду. Райондун акиминин, ички иштер, билим берүү кызматкерлеринин спектаклдин соңунда балдар үчүн айткан таасирдүү сөздөрү катышуучуларды кайдыгер калтырган жок. Иш-чара Кыргыз Республикасынын Министрлер Кабинетинин 2024-жылдын 27-августундагы “Окуучулардын катышуусу менен маданий-массалык иш-чараларды өткөрүүнүн тартибин жана алардын коопсуздугун камсыз кылуу боюнча талаптарды бекитүү жөнүндө” №520 токтомунда көрсөтүлгөн коопсуздук эрежелерин толук сактоо менен өткөрүлдү. Аталган драманын райондогу башка мектептерге да көрсөтүлүүсү күтүлүүдө.

Узен АТАКАНОВ, Аксы району