ӨЗГӨЧӨ ФОРМАТТАГЫ АТА-ЭНЕЛЕР ЧОГУЛУШУ

 “Креатив-Таалим” Билим берүү комплексинде окуу жылынын экинчи жарымында окуучулардын жетишкендиктери тууралуу маалымат берүү максатында класс жетекчилер, предметтик мугалимдер жана ийрим жетекчилери, мектеп дарыгери, ашкана кызматкери менен өзгөчө форматтагы ата-энелер чогулуштары өткөрүлүп келет.

Маалыматка таянсак, практика жүзүндө бул ыкма окуучулардын билим алуусун жакшыртууда, ата-энелердин жана мугалимдердин ортосундагы байланыштарды чыңдоодо жакшы жыйынтыктарды берүүдө.

Чогулуштун бул форматында  ата-эне баласынын ар бир предмет боюнча кандай деңгээлде окуп жаткандыгы тууралуу так маалымат алат. Мында мугалим баланын жетишкендиктери жана көйгөйлөрү боюнча түшүндүрмө берип, жекече кеңештерди жана сунуштарды айтат.

Бул чогулуштардын дагы бир максаты — ата-эне менен мугалимдердин өнөктөштүгүн чыңдоо болуп саналат. Ата-энелер мектептеги билим берүү процесси менен жакындан таанышып, баласынын ар тараптуу жана ийгиликтүү өсүшүнө өз салымын кошууга мүмкүнчүлүк алышса, мугалимдер окуучулардын үйдөгү тарбиясы, окуу шарты тууралуу көбүрөөк маалымат алышат. Ошол эле учурда окуучу мугалимдердин, ата-энесинин колдоосун сезип, билим алууга жоопкерчиликтүү мамиле кылат.

Г.А., “КБ”