ТУУ КҮНҮНӨ АРНАЛДЫ

Ош технологиялык университетинин коомдук илимдер кафедрасы 3-март – Кыргыз мамлекетинин Туу күнүнө карата семинар уюштурду.

Семинарга коомдук илимдер кафедрасынын жалпы жамааты, табигый-гуманитардык борбордун профессордук-окутуучулук курамы жана университеттеги бардык институттардын студенттери катышты.

Аталган иш-чарада легендарлуу парламенттин депутаты, тарых илимдеринин доктору, профессор Нурунбетов Балтагул Аттокурович туунун кабыл алынышы жана анын тарыхы тууралуу баяндама жасады. Ошондой эле, Кыргызстандын 1924-1952-жылдарда кабыл алынган тууларынын тарыхы тууралуу коомдук илимдер кафедрасынын доценти, тарых илимдеринин кандидаты Сатимбай Осмонов лекция окуду.

Б.Нурунбетов Кыргыз Республикасынын туусунун жаралуу, өнүгүү тарыхына жана туунун мамлекеттик маанисине кеңири токтолуп, кыргыздардын тарыхындагы асаба, желек, белги ж. б. тарыхый маанидеги белгилер жөнүндө кеңири маалымат берди.

Бул иш-чаранын негизги максаты жаштарды мекенчилдикке, өз элинин патриоту болууга жана Ата Мекенди сүйүүгө тарбиялоо болуп саналат. Студенттер жана катышуучулар тарабынан лекторго кыргыз тарыхына байланышкан суроолор берилип, кызыктуу талкуу жүрдү.

Кыргыз Республикасынын мамлекеттик туусу 1992-жылы 3-мартта Жогорку Кеңеш тарабынан бекитилип, 5-март күнү өкмөт үйүнүн имаратында көтөрүлгөн. Туунун авторлору: Э.Айдарбеков, Б.Жайчибеков, С.Иптаров, Ж.Матаев, М.Сыдыков.

ОшТУнун басма сөз кызматы.