НАРЫНДЫКТАР ЖАҢЫ МОДЕЛГЕ ӨТҮҮГӨ ДАЯРБЫ?

Билим берүү жана илим министрлигинин “2024-2028-жылдарга Кыргыз Республикасынын мектептик билим берүүнүн он эки жылдык түзүмүн этап-этабы менен киргизүү боюнча иш-аракеттер планын ишке ашыруу жөнүндө” буйругун аткарууда Нарын облустук усулдук билим берүү борборунун, райондук,  шаардык  билим берүү  бөлүмдөрүнүн атайын буйруктары   чыгып,  координациялоочу штабдын курамдары түзүлүп, иш-пландар бекитилген.

Нарын облустук усулдук билим берүү борборунун  кабинет башчысы Г.Таранчиеванын айтуусунда,  реформанын максаттарын  жана  артыкчылыктарын түшүндүрүү иштери үзгүлтүксүз жүрүп келүүдө.

— Жаңы билим берүү системасына өтүүнүн негиздери, маалыматтары жана милдеттери, билим берүүнүн моделдери, күтүлүүчү натыйжалары, концепциясы боюнча толук түшүндүрүү иштери жүргүзүлүп, аткарууга алынды. Түшүндүрүү  иштерине атайын слайддар жасалып,  райондук, шаардык билим берүү бөлүмдөрүнүн кызматкерлери, мектеп жетекчилиги тартылып, өткөрүлгөн  жолугушууларга ата-эне, коомчулук, мугалимдер катышты. Жолугушуунун акырында ата-энелерден, мугалимдерден түшкөн суроолорго жооптор берилди. Жыйынтыгында жолугушуунун катышуучулары 12 жылдык билим берүүгө өтүү  боюнча толук кандуу маалымат ала алышты, — дейт кабинет башчысы.

Учурда облуста улуттук билим берүү системасына өтүү боюнча иштер этап-этап менен жүрүп жатат. 2024-жылы трансформациялоону ишке ашыруу үчүн мектептерди материалдык-техникалык  жактан камсыздоо,  мугалимдерди окутуу иштери боюнча Билим берүү жана илим минстрлигинин буйругу менен бекитилген жалпы билим берүү уюмдарынан STEM мугалимдеринин квалификациясын жогорулатуу боюнча мугалимдер окуудан өтүштү.

Билим берүү уюмдарында, жогорку класстын окуу кабинеттерин профилдик программаларды ишке ашыруу жана баштапкы эмгек көндүмдөрүн өнүктүрүүгө карата  окуу куралдары  менен камсыз кылуу үчүн иш-аракеттер көрүлүүдө.

Мектептерде жаңы модель менен билим берүүгө өтүүгө карата атайын бурчтар уюштурулган. Райондук жана шаардык билим берүү бөлүмдөрү тарабынан  мугалимдердин сапаттык жана сандык түзүмү,  5 жана 6 жашка толгон балдардын санын жашаган жеринин  чегинде эсепке алуу боюнча  анализдер  жүргүзүлдү.

STEM-билим берүү (математика, физика, химия, биология) боюнча атайын кабинеттерди жана лабораторияларды түзүү жана жабдуу боюнча да жергиликтүү башкаруу органдарына  кайрылуулар жөнөтүлгөн. Учурда Ү.Асанов атындагы  Нарын облустук жатак-мектебинде кесипке багытталган билим берүү боюнча тигүү машиналары алынып келинип,  ийрим иштери жүргүзүлүп жатат. Ошондой эле компьютердик кабинет жаңы компьютерлер менен жабдылды.

Нарын облустук усулдук билим берүү борбору жана Салымбеков инновациялык  университети менен бирдикте  улуттук билим берүүгө өтүү боюнча мугалимдер арасында түшүндүрүү  иштери  жүргүзүлүп,  облус боюнча 356 мугалим тартылган.

— Үстүбүздөгү окуу жылында облустун жалпы орто билим берүүчү мектептерине 12 мугалим жетишпейт. Алсак, Ак-Талаа районуна 1 мугалим — физика, Жумгал районуна 9 мугалим – англис тили, математика, физика, химия, информатика, Кочкор районуна 2 мугалим   – тарых, химия предметтеринен. Ал эми калган райондор мугалимдер менен 100% камсыз, — дейт Г.Таранчиева.

Гүлнара АЛЫБАЕВА, “”Кут Билим”