НАРКТУУ АПАЛАРДЫН НАРК САБАГЫ

“Нарктуу апалар” коомдук бирикмеси Бишкек шаарындагы №81 мектептин окуучулары үчүн нарктуу апалардын үй-бүлөдөгү жана турмуштагы орду тууралуу кызыктуу маалыматтар камтылган иш-чара өткөрдү.

“Нарктуу апалар” коомдук бирикмесинин уз айымдары өздөрүнө берилген тапшырмалардын алкагында көркөм кийимдер, сайма, курак сыяктуу эң сонун жасалгаларды алып чыгышты.

— Уз апалардын колунан жаралган улуттук не бир сонун кийимдер, турмуш-тиричиликте колдонуучу буюм-тайымдар бар. Окуучулар бой үйдүн жасалгалары, сайма саюунун түрлөрү, курактардын жаралышы, алардын авторлору тууралуу кызыктуу маалыматтарды алышып, өз көздөрү менен көрүштү. Кыргыздар баш кийимдердин, сырт кийимдердин, бут кийимдердин канчалаган түрлөрүн тигип, ар бирине өтө терең маани беришкен. Мисалы, эркек балдардын кийимдери кандай болуш керек, кыздардын жаш курагына жараша кийимдери кандай болууга тийиш жана ошондой эле апалардын, аталардын кийимдери кандай мааниде тигилгендиги тууралуу эң сонун маалыматтарды беришти. Уз апалар кийизден жасалган буюмдар тууралуу кенен айтып берип эле тим болбой, мастер класс өтүштү, — дейт “Нарктуу апалар” коомдук бирикмесинин жетекчиси Батма Султанбаева.

Уюштуруучулардын айтымында, бул иш-чарада улуттук тамак-аштын түрлөрүнө да кеңири орун берилип, келген меймандар уз апалар жасап келген даамдардан ооз тийишти. Иш-чаранын катышуучулары кыргыздардын жашоо тиричилигинде колдонулган жакшы нерселердин баардыгы апалардын нарктуулугун, иштермандыгын эле даңазалабастан, баланы тарбиялоо, үйдү жасалгалоо, жаратылыш менен айкалышып жашоого жасаган мамилелерин да көрсөткөндүгү тууралуу эң сонун маалыматтарды алышты.

Айнагүл КАШЫБАЕВА,

“Кут Билим”