Мугалимди басмырлагандардын айыбын 25 эсеге көбөйтүү сунушталды

Мугалимдин ишине кийлигишип, милдеттин аткарып жаткан педагогду мазактагандарга чоң айып салуу сунушталды. Тиешелүү мыйзам долбоорун Билим берүү жана илим министрлиги коомдук талкууга чыгарды.

Ага ылайык Укук бузуулар жөнүндө кодекстин «Педагогикалык кызматкерге карата сыйлабагандыкты көрсөтүү» деп аталган 102-1-беренеси «Билим берүү уюмунун педагогикалык кызматкеринин кесиптик ишине тоскоолдук кылуу» болуп өзгөрүп, кошумча нормалар менен толукталууда.

Мугалимди кесиптик милдеттерине байланышпаган иштерге жана иш-чараларды өткөрүүгө тартуу, мыйзамда каралбаган отчетторду, маалыматтарды талап кылып, текшерүүлөрдү жүргүзүү, аларга товарларды жана кызмат көрсөтүүлөрдү сатып алуу боюнча милдеттерди жүктөө анын ишине кийлигишүү болуп саналып, ал үчүн 20 миң сом айып пул салынат.

Ал эми мугалимди сөгүү, шылдыңдоо, кордоп тийишүү, адепсиз жаңсоолорду (белгилерди) же предметтерди көрсөтүү, анын ичинде ЖМК же телекоммуникация тармактары аркылуу билдирилген сыйлабагандыкты көрсөтүү үчүн 25 миң сом каралган.

Эгерде бул жосундар 16 жашка чейинки окуучу тарабынан жасалса, ата-энесине же мыйзамдуу өкүлүнө эскертүү берилет. Эгерде эскертүү берилгенден кийин жыл ичинде кайталанса 30 миң сом айып салынат.