ДЕПУТАТТЫН БЕЛЕГИ

ЖК депутаты Мурадил Сыдыков өзүнүн жеке демилгеси менен Нарын облусунун Ак-Талаа району боюнча ЖРТда окуучулары эң жогорку упай топтогон мектепке автоунаа тартуулайт. Бул тууралуу ЖКнын коомчулук жана ЖМК менен иштөө бөлүмү билдирди.

Депутат шарты катаал, эң алыскы райондордун бири болгон Ак-Талаа районунда мектеп, бала бакча куруу, таза суу менен камсыздоо өңдүү көйгөйлөрдү чечүүгө жакындан жардам бергенге аракеттенип келет. Айрыкча, билим берүү мекемелерине заман шартына ылайык ыкмаларды киргизүү, жаңы жабдуулар менен жабдуу ж.б. өзгөчө көңүл бурат. Андан тышкары, акыркы эки-үч жылдан бери ЖТРдан эң жогорку балл алгандарга атайын сыйлык тапшырып келгени маалым. Быйыл да жалпы республикалык тестирлөөдө эң жогорку балл алган мектепке автоунаа, окуучуга ноутбук жана башка кызыктыруучу сыйлыктарды тапшырууну мерчемдөөдө.

Депутаттын мындай аракети райондогу мектептер арасында атаандаштыкты пайда кылып, окуучулардын мыкты окууга умтулуусуна түрткү берип, билим берүүнүн сапатын жакшыртууга өбөлгө болору анык.