БИЛИМДЕГИ БИЙИКТИКТИ БАГЫНДЫРГАН ЭКИ АЙЫМ

Билим жана технология дүйнөсүндөгү кыргызстандык айымдар Асель Сартбаева жана Елена Соболева Central Asia Startup CUP иш-чарасына катышат. Бул тууралуу Кыргызпатенттин басма сөз кызматы билдирди.

Central Asia Startup CUP иш-чарасынын уюштуруучулары 24–25-апрелде өтө турган бул чоң иш-чаранын өзгөчө коноктору катары дүйнөлүк илим жана технология жаатында таанылган кыргызстандык профессор Асель Сартбаева менен АКШдагы алдыңкы EdTech компанияларынын бири болгон Honorlockтун негиздөөчүсү Елена Соболева келерин сыймык менен белгилешүүдө.

Асель Сартбаева – Улуу Британиядагы Бат университетинин химия илимдеринин профессору, Британ Королдук илим коомунун мүчөсү, биотехнологиялык стартап EnsiliTech компаниясынын тең негиздөөчүсү жана башкы аткаруучу директору. Ал биомолекулаларды туруктуу кармоо жаатында дүйнөлүк деңгээлдеги изилдөөчү катары таанылган. Анын вакциналарды жана белокторду муздатуу чынжырысыз сактоого мүмкүндүк берген жаңыланма технологиясы дүйнө жүзүндө кеңири таанылып, алыскы аймактарда медициналык жеткиликтүүлүктү түп-тамырынан өзгөртө алат.

Central Asia Startup CUP алкагында профессор А.Сартбаева илим, технология жана ишкердиктин кесилишиндеги тажрыйбасы менен бөлүшүп, глобалдык деңгээлде илимий стартап кантип түзүлүп, өнүгөрүн айтып берет. Ал EnsiliTech кантип түзүлгөнүн, анын миссиясын жана бул компания дүйнө жүзүндөгү кандай көйгөйдү чечүүгө багытталганын да айтып өтөт.

Дагы бир кыргызстандык айым Елена Соболева – дүйнөлүк тажрыйбасы бар ийгиликтүү ишкер. Анын Honorlock аттуу компаниясы АКШда жана башка өлкөлөрдө онлайн коопсуздук жана билим берүү технологиялары боюнча лидерликке жетишкен. Ал миллиондогон доллар менен бааланган B2B стартаптын негиздөөчүсү жана каржы директору болуп, ийгиликтүү чыгууну ишке ашырган. Учурда ал дүйнө жүзүндөгү стартап негиздөөчүлөргө АКШнын “акылдуу” капиталы жана Борбордук Азиянын жогорку деңгээлдеги IT-таланттары менен масштабдоо боюнча жардам берип келет.

Елена Соболева Кыргызстандагы чакан шаарда төрөлүп, чоңойгон. Өзүнүн жолунун венчурдук инвестиция жана технологиялык ишкердикке алып барарын ал кезде элестеткен да эмес. 2013-жылы АКШда MBA окуп жүргөн учурда бизнес-пландардын сынагына катышып, бул Honorlock стартапын негиздөөгө түрткү болгон. Компания 150+ адамдан турган команданы түзүп, $50 миллион венчурдук инвестиция алып, өзүнүн технологияларын патенттеген. Еленанын тарыхы катышуучуларга идеядан реалдуу стартапка чейин болгон жолду көрсөтүп, аялдар жетектеген командалар кандай мүмкүнчүлүктөр жана кыйынчылыктар менен бетме-бет келерин ачыктап берет.

Central Asia Startup CUP – бул Борбор Азиядагы стартаптар, инвесторлор, адистер жана инноваторлорду бириктирген эң ири регионалдык иш-чара. Бул ирет ал биринчи жолу өткөрүлүп, Accelerate Prosperity акселератору тарабынан Улуу Британия Өкмөтү жана Кыргызпатент менен биргеликте уюштурулуп жатат. Иш-чара стартаптарга, илимпоздорго, ишкерлерге жана технологиялык лидерлерге жаңы мүмкүнчүлүктөрдү тартуулайт.

Иш-чара Accelerate Prosperity акселератору – Кыргызстандын №1 бизнес-акселератору, Улуу Британия Өкмөтү тарабынан каржыланган Борбор Азиядагы инклюзивдүү жашыл өнүгүү программасынын жана Кыргыз Республикасынын Өкмөтүнүн алдындагы Интеллектуалдык менчик жана инновациялар мамлекеттик кызматынын колдоосу менен өткөрүлөт.

Айнагүл КАШЫБАЕВА,
“Кут Билим”