БААРДЫГЫ БАШТАЛГЫЧ КЛАСС МУГАЛИМДЕРИНИН КОЛУНДА

Баткен облусунун Кадамжай районундагы Чечме айылындагы мектептин башталгыч классынын мугалими Динара Камбарова Москва шаарына саякатка барат. Динара “Биринчи мугалим” сынагында жеңүүчү деп табылып, сынакты уюштурган Санжарбек Данияровдун фондусунун баш байгеси – Москва шаарына 10 күндүк маданий-маалымат арттыруучу сыйлыгына ээ болду.

Мугалимдер турмуштагы көп эле, биринчиси, бирок дайым бирөө эле…

Бишкек шаарындагы И.Арабаев атындагы КМУнун жыйындар залы дем алыш күнгө карабай, толкунданган, кабатырланган мугалимдерге толуп турду. Алар — республикабыздын туш тарабынан келишкен башталгыч класстардын мугалимдери, күйөрмандары эле. Санжарбек Данияровдун коомдук фонду жети жылдан бери уюштуруп келаткан “Биринчи мугалим 2018” сынагынын экинчи туру жыйынтыкталып, жеңүүчүгө баш байге ыйгарылмак. Окуу жайдагы “Айтматовдун өргөөсүнө” сынактын биринчи турунун катышуучулары, калыстар тобу, күйөрмандар жана жалпы эле билим берүүгө кайдыгер эмес адамдар чогулушту.

“Биринчи мугалим 2018” сынагынын биринчи турунда мугалимдер “Мугалимдик – бул кесиппи же талантпы?” деген тема боюнча дилбаян жазышып, анын жыйынтыгында эң жогорку балл топтогон жети мугалим экинчи турга катышууга укук алган. Алар: Кенжекан Арыкбаева (Талас районунун Кеңеш айылындагы Г.Орозалиева атындагы мектеп), Айнура Аширова (Түп районунун Талды-Суу айылындагы М.Элебаев атындагы мектеп), Назира Ашымова (Ак-Суу районунун Челпек айылындагы М.Рахимова атындагы мектеп), Гүлсара Жакыпбекова (Бакай-Ата районунун Боо-Терек айылындагы Д.Дүйшөбаев атындагы мектеп), Динара Камбарова (Кадам-Жай районунун Чечме айылындагы №37 мектеп), Марина Коробченко (Ак-Суу районунун Отрадное айылындагы М.Калиев атындагы мектеп) жана Фарида Суранчиева (Бакай-Ата районунун Ак-Дөбө айылындагы Акчал уулу Дүйшөн атындагы мектеп).

С.Данияровдун коомдук фондунун негиздөөчүсү Асель Санжарбековна Даниярова сынакты уюштуруу жана дилбаяндарды кабыл алуу тартибине кененирээк токтолду.

— Мен быйыл жетинчи жолу өткөрүлүп жаткан бул сынакка атайын алыстан келишкен мугалимдерге абдан кубанычта экендигимди жана ыраазычылыгымды билдирип кетким келет. Бул залда отурган мугалимдердин баары – башталгыч класстын мугалимдери, тагыраак айтканда, биринчи мугалимдер. Мен дайыма өлкөнүн келечеги — башталгыч класстардын мугалимдеринин колунда деп айтып жүрөм. Чындыгында эле ошондой. Биз ошол биринчи мугалимдерге мүмкүнчүлүгүбүзгө жараша маданий-маалыматтык колдоо көрсөтсөк деген максатта ушул сынакты уюштуруудабыз. Мен сынак ачык-айкын, адилет уюштурулуп жаткандыгынын бир күбөсү катары айтып коеюн, бизге келип түшкөн дилбаяндарды мен өзүм бирдей форматка келтирип, аты-жөнүн ж.б. маалыматтардын баарын алып таштап, анан гана калыстар тобуна электрондук түрүндө жөнөтөм. Калыстар тобуна мен жогору баалаган билим берүү тармагынын адистери топтолгон. Демек, баары калыс бааланат деп ишенсек болот.

Экинчи турдун катышуучулары дилбаяндын негизги идеясын, мугалимдик иш тажрыйбасындагы кызыктуу окуяны айтып беришет жана залдан узатылган суроолорго жооп беришет. Андан тышкары, атайын чакырылган ардактуу конокторубуз, музыкалык белегибиз бар. Ушунун баары мугалимдердин билимине кошумча билим кошуп, жан дүйнөсүнө жагымдуулукту тартууласа деген тилегим бар — деди Асель Санжарбековна.

Мугалимдер өздөрү айтышкандай, көпчүлүк учурларда башталгыч класстардын мугалимдери көз жаздымда кала берет. Аларды өздөрү окуткан кенже класстын окуучуларындай көрүшөбү, айтор алар тууралуу дээрлик эч жерде атайын сөз деле айтышпайт. Алардын өзгөчө толкундангандыгынын бир себеби ушундан көрүнүп турду.

Мугалимдер жамааты дегенде көзгө урунчу дагы бир белгилүү жагдай бар, бул – мугалимдердин жамаатынын дээрлик 100 пайызы аялзаты болгондугу. Сынакта деле буга чейин ушундай болуп келген. Бирок быйыл жаңылык болуп, эки агай мугалим катышканы өзгөчөлүктү жарата алды десек, аша чаппайбыз. Алардын бири — Кара-Буура районунун Жоон-Дөбө айылындагы Билимкана мектебинин мугалими Болотбек Кыркбаев, экинчиси – Түп районунун Сары-Дөбө айылындагы орто мектептин башталгыч классынын мугалими Таалайбек Мырзабаев экендигин баса белгилеп койбосок болбойт.

Ардактуу конок — Роза Айтматова

Экинчи турдун катышуучулары берилген тапшырмаларды өздөрү окуткан окуучулардай баеолук менен кыска жана нуска айтып беришсе, дагы бири Айтматовдун каарманы болуп чыгып, дагы бири баштан аяк ыр менен айтып берип, айтор отургандарды дээрлик кайдигер калтырышкан жок. Калыстар калыс пикирин айтып, жыйынтык чыгаргыча, залдагылар атайын чакырылган атактуу инсандар Роза Айтматова, Жаңыл Абдылдабек кызы ж.б. коноктор менен кызуу баарлашып отурду.

Айрыкча, быйыл кыргыз эли эле эмес, дүйнө жүзү 90 жылдыгын белгилеп жаткан залкар жазуучубуз Чыңгыз Айтматовдун юбилейлик жылында иш-чарага атайын ардактуу конок болуп чакырылган Роза Төрөкуловна Айтматованын келиши мугалимдер үчүн чыныгы кубаныч болду. Роза Төрөкуловна өзү да ардагер агартуучу катары кесиптештерине сый-урматын көргөзүп, сүрөткө түшчүлөр менен сүрөткө түшүп, суроо бергендердин суроолоруна жооп берип жатты. Роза Төрөкуловна өзүнүн атасы Төрөкул Айтматов, апасы Нагима Айтматова жөнүндө “Тарыхтын ак барактары” деген эскерүү китеп жазганын, жакында эле окурмандарга бир тууган эжеси Лютфиянын уулу Асан Ахматов менен биргеликте “Человек жив, пока о нем помнят люди” деген китепти жазып, жарыкка чыгарганын айтып, жаңы чыккан китептен жеңүүчүлөргө белекке тартуулады.

Бул жолку жеңүүчүлөргө жана лауреаттарга Роза Төрөкуловнанын колунан диплом алуу өзгөчө сыймыктуу болгондугун да белгилеп коюу керек.

Сынактын жеңүүчүлөрүн И.Арабаев атындагы КМУнун ректору, тарых илимдеринин профессору Төлөбек Абылович Абдырахманов да куттуктап, өзүнүн каалоо-тилектерин айтты. Ал өз сөзүндө университеттин жамааты алыскы жана жакынкы айылдардан келишкен мугалимдерге дайыма кубанычта экендигин, илим-билим жаатында кызматташууга даяр экендигин баса белгиледи.

2018-жылдын “Биринчи мугалими” – Камбарова Динара

Сынактын башталышынан да аякташын чыдамсыздык менен күтөт эмеспизби, ансыңарындай, сынак да аягына келип жетип, Баткен облусунун Кадамжай районундагы Чечме айылындагы №37 1-Май мектебинен келген башталгыч класстын мугалими Динара Камбарова жеңүүчү деп табылды. Эми ал өзү Москва шаарына 10 күндүк маданий-маалымат арттыруучу саякатка барса, классындагы окуучулары менен биргеликте эс алуу күндөрү Бишкек шаарына ошондой эле маданий-маалымат арттыруучу экскурсия келмекчи. Бишкекке окуткан классы менен чогуу андан башка, экинчи жана үчүнчү орунду ээлеген мугалимдер: Ысык-Көл облусунун Ак-Суу районундагы Челпек айылында жайгашкан М.Рахимова атындагы орто мектептин мугалими Назира Ашымова жана Талас облусунун Бакай-Ата районундагы Ак-Дөбө айылында жайгашкан Акчал уулу Дүйшөн атындагы орто мектептин башталгыч классынын мугалими Фариад Суранчиевалар да келишет. Экинчи турдун жеңүүчүлөрүн чын жүрөгүбүздөн куттуктайбыз!

Иш-чаранын жүрүшүндө калыстар тобунун төрайымы Жаркын Рыскулова жасаган презентация зор кызыгууну туудурду. Ал биринчи турдун катышуучуларынын дилбаяндарын баалагандан кийинки таасирлеринен бөлүштү. Мугалимдер ал презентациянын көчүрмөсүн сурап алып кетишти. Аларга жардамы тиет деп ишенгибиз келет.

Бул жолу музыкалык белекти мугалимдерге К.Молдобасанов атындагы Кыргыз улуттук консерваториядан музыкалык билим алган Түштүк Корея скрипкачысы Су Чи Хе жана аны роялда коштогон, Кыргыз улуттук консерваториясынын дагы бир бүтүрүүчүсү Айтурган Беренбек кызы тартуулады. Музыканттар классикалык эки чыгарма жана “Запах женщины” кинотасмасынан Астор Пьяццолланын “Аргентина тангосун” аткарып беришти.

Иш-чаранын соңунда катышуучулардын баарына Катышуучунун күбөлүгү, Фонд басып чыгарган китептер салтанаттуу тапшырылды. Ал эми жеңүүчүлөргө Роза Айтматованын жаңы китеби тийди. Андан тышкары KITEPKANA.KG сайтынын негиздөөчүсү Азамат Шаршебаев да катышуучуларга бир нече китептерди белекке тартуулады.

Айнагүл Кашыбаева,

“Кут Билим”