“АКЫЛМАН” ПРЕЗИДЕНТТИК ЛИЦЕЙИ 2025-2026-ОКУУ ЖЫЛЫНА КАБЫЛ АЛУУНУ БАШТАДЫ

2025-жылдын 1-апрелинен тарта Кыргызстанда “Акылман” президенттик лицейи 2025-2026-окуу жылына карата сынактык тандоону баштады. Бул тандоого Кыргыз Республикасынын жалпы билим берүү уюмдарынын биринде 6-класста окуп жаткан окуучулар катыша алат.

Мектептик, мектептен тышкаркы жана кошумча билим берүү башкармалыгынын башкы адиси Айнура Кусейинова быйыл кабыл алуу үчүнчү жолу өткөрүлүп жатканын белгилеп, 6-класстын окуучуларын сынакка активдүү катышууга чакырды. Анын айтымында, өткөн жылы 30 миңден ашуун бала “Акылмандын” сынагына катышкан. Белгилей кетсек, өткөн жылы сынакка 6-8-класстын окуучулары катышкан.

“Акылман” президенттик лицейинин директору Эмиль Рыскулов быйыл test.akylman.edu.kg сайты иштелип чыкканын жана расмий Telegram каналдары, социалдык баракчалар аркылуу кеңири маалымат берилгенин маалымдады.

“Учурда лицейде жалпы 195 окуучу билим алууда. Бул жерде 7-класстан үч, 8-класстан үч, 9-класстан эки класс комплекти бар. 7-класста – 75 окуучу, 8-класста – 72 окуучу, 9-класста – 48 окуучу окуйт. Алардын ичинен 101 кыз, 94 эркек бала”, – деп кошумчалады лицейдин жетекчиси Эмиль Рыскулов.

Конкурсту уюштуруу жана өткөрүү боюнча “Акылман” президенттик лицейинин адиси Азирет Асан уулу онлайн тесттерде коррупциялык тобокелдиктердин алдын алуу жана бирөөнүн жардам берүүсүнө бөгөт коюу үчүн коопсуздук системалары иштелип чыкканын билдирди. Ал, ошондой эле, “Эгерде тест тапшырып жаткан талапкер башка ресурстан жооп издесе, тест дароо жабылат” деп катышуучуларды эскертти.