ЖРТда кездешчү тапшырмалар

11-класс, кыргыз тили

Сабактын тиби: Жалпылап кайталоочу сабак.

Сабактын башка илимдер менен байланышы: кыргыз адабияты, тарых, математика, физика.

Сабакта колдонулган усулдар: интерактивдүү методдун айрым стратегиялары, “KAHOOT”, “БББ”, текст менен иштөө, аналогияларды табуу.

Сабактын жабдылышы: таркатма материалдар, слайд, видеороликтер, барак А-4, маркер, доска, пректор, ноутбук, кыргыз тили 11-класс, “Нова” тесттери.

Мугалимдин ишмердүүлүгү: Саламдашып, окуучулардын сабакка катышуусун тактоо, класстын тазалыгына көңүл буруу, топторго бөлүп алуу.

1-топ «Жаратмандар» (Келечекте жаңы идеяларды жаратуучулар)

2-топ «Зиректер» (Баамчылдар)

Жагымдуу маанай түзөт. Алтын эрежелерди кабыл алышат.

1) Сабакка активдүү катышабыз.

2) Бири-бирибиздин оюбузду угабыз.

3) Жаңы идея алабыз.

4) Билгендерибизди башкаларга чачыратабыз.

Экранга баалоо критерийин түшүрүп, өзүн-өзү баалоо баракчаларын таркатат.

1. Аналогияларды туура таба алуу
2. Маанилерине карап сүйлөмдөрдү толуктоо
3. Окуп, түшүнө алуу
4. Орфографиялык сабаттуулугу
5. Тесттик суроолорго жооп берүүсү
6. Топто активдүү иштөө

Үй тапшырманы суроо: Сүйлөмдөргө тыныш белгилерин туура коюу. Жакшы келсе кут жаман келсе жут. Бах Кандай гана кооз табият. Тил албасты жумшаганча тына тына өзүң бар. А П Чехов  «Адамда баары сонун болууга тийиш  өңү да  сөзү да  кийими да» деп  айткан.

-Даярдыктарың кандай?

-Жан дилим менен аракеттенип жатам.

Актуалдаштыруу: Диалог жүргүзөт, окуучунун эске тутуусун, көңүл буруусун активдештирет. Аналогияларды кантип табабыз? Байланыштын канча түрү бар? Окуу жана түшүнүү тексттери менен кантип иштейбиз?

Өтүлгөндөрдү кайталоо: Аналогиялар менен иштөө жолдорун эстерине салат.

Интерактивдүү көнүгүүлөр: 1-топтук тапшырма.Аналогияарды табуу (Ар бир топко 10дон аналогия)

1. сөз : тамга

А) бак : бутак

Б) чөп : сабак

В) өң : кызыл

Г) сан : цифра

2. жаян : чортон

А) бөлтүрүк : ит

Б) чөө : карышкыр

В) сүт эмүүчү : кит

Г) төө : төө куш

3. спидометр : ылдамдык

А) термометр : температура

Б) мейкиндик : көлөм

В) барометр : миллибар

Г) амперметр : вольт

4. вольт : вольтметр

А) литр : көлөм

Б) миллибар : барометр

В) минута : убакыт

Г) узундук : сызгыч

2-топтук тапшырма. Текст менен иштөө

1-топ “Ак куу” тексти

2-топ “Калай” тексти

3-топтук тапшырма. Ушул эле тексттер силерге канчалык деңгээлде түшүнүктүү болгонун

текшерүү максатында сүйлөмдөрдү толуктайбыз.

Колодон … куюп, …, …, … жасашкан.

А) эстелик, кылыч, найза, акча

Б) айкел, жаа, жебе, тыйын.

В) статуяларды, кылыч, идиш, акча-тыйын

Г) айкел, найза, жаа, жебе

Калай кайрадан … металлдардын арасында … орундардын … ээледи.

А) көптөгөн, ардактуу, бирин

Б) миңдеген, барктуу, миңин

В) жүздөгөн, кадырлуу, көбүн

Г) ондогон, өтүмдүү, бир нечесин

Ак куу байыртадан эле …, … … … символу катары саналат.

А) сүйүүнүн,аруулук менен назиктиктин

Б) актыктын, тазалык менен сулуулуктун

В) жаштыктын, мээрим менен боорукерликтин

Г) күчтүүлүктүн, сактык менен куулуктун

Көлмөдө … жүргөн ак куу андан да … , … көрүнөт.

А) каалгып, аппак, койкоюп

Б) чардап, керемет, сулуу

В) учуп, бийик, шаңдуу

Г) сүзүп, кооз, сулуу

Практикалык көңүгүү: KAHOOT тиркемеси аркылуу фразеологизмдердин түрлөрү боюнча тест берилет. Демек, фразеологизмдер, анын бөлүнүүсү боюнча толук маалымат берилет.

https://create.kahoot.it/share/90077bbd-9425-4ee5-a55a-c7b17860bf41

Бышыктоо: «Ким сабаттуу?» оюну аркылуу окуучулардын бүгүнкү сабакта алган билимдери жалпы жыйынтыкталат.

Баалоо: Окуучулардын өздөрүнө коюлган баалоосу менен жыйынтык чыгарат.

“5” – 15-12 упай

“4” – 11-8 упай

“3” – 7-4 упай

“2” – 3-0 упай

Үй тапшырма: Өз алдынча аналогияларды түзүп келүү. “Максатыма жетем” деген темада эссе жазып келүү.

Сиренгүл Кожобаева, Ош облусунун Кара-Суу районунун №19 Т. Мусаев а.о.м. кыргыз тили мугалими