Максат — ийгиликке кадам. Тарбия саат

Соорбекова Нуриза, Абдуллаев Сагын атындагы №6 орто мектебинин мугалими

Сабакта колдонулган методдор:  жалпы талкуу, мээ чабуулу, жеке жана чакан топтордо иштөө.

Сабактын жүрүшү:

Уюштуруу этабы:

Саламатсыңарбы балдар, маанайыңар жакшыбы? Бүгүнкү сабагыбызды видеоролик менен баштайбыз. “Максатка жетүү үчүн өрнөк алуучу чымчык” аттуу анимациялык видеоролик көрүшөт.

“Ийгиликке жетүү үчүн эки нерсе маанилүү, баштоо жана максатка карай тынымсыз умтулуу” бүгүнкү сабагыбызды ушундай мотивациялык ураан менен уланткым келип турат.

Жаңы темага киришүү. Теманы божомолдоо

“Алга кадам таштабасаң тайбайсың, сурабасаң жооп албайсың,  аракет кылбасаң максатыңа жетпейсиң”

Окуучуларга суроо берилет.

Максат деген эмне?

Кыял деген эмне?

План деген эмне?

Азаматсыңар!

Жаңы теманы түшүндүрүү, маалымат берүү

Максат — бул каалоонун жыйынтыгы, б.а. биз каалаган нерсени милдеттүү түрдө ишке ашыруу. Адамдын көптөгөн чоң максаттары болушу мүмкүн. Мисалы: татыктуу билим алуу, чоң кооз үй салуу, акылдуу балдарды тарбиялоо ж.б. Бирок, жашоодогу башка максаттардын ичинен эң негизгиси бул жашоонун максаты. Кыял- адамдын жашоосун маңызга толтурган ой,  идея, асыл каалоо.  Кыялыбызды максатка айландыра алабызбы жана кантип? Келгиле, кыялды максатка айландыруугу аракет кылылы:

• Конкреттештирүү жана ой жүгүртүү (белгилүү бир дата менен жазылган кыял максатка айланат)
• Пландаштыруу (максатка жетүү үчүн иш-аракеттерди пландоо)
• Иш-аракеттерди ишке ашыруу (пландоо аракеттери кыялды ишке ашырат)

Кыял — бул жөн гана кыял. Ал эми максат — бул планы жана белгилүү мөөнөттөрү бар аткарылуучу кыял (Харви Маккей)

Чыгармачылык жумуш/Практикалык иш

“Топтор жана чака” оюну. Оюнда чака коюлат, чакадан 2м аралыкта бир топ, дагы 2м кийин дагы бир топ коюлат. Окуучулар топторду чакага салганга аракет кылышат, чакага жакын топту чакага оңой эле салышат, ал эми кийинки топту салуу кыйыныраак болот, оюндун максаты окуучулардан суралат.

— Азаматтарым менин! Ооба, биздин максаттарыбыз дагы кыска мөөнөттүү жана узак мөөнөттүү болуп бөлүнөт.

Окуучуларга ак барактар берилет.

— Ар бириңер максаттарыңарды жазгыла. Азаматсыңар! Эми каалоочулар окуп койгулачы!?

М: Бекзат англис тилин үйрөнөм деп максат койду. Бекзат бул максатына жетүү үчүн эмне кылуучу керек?

Максатка жетүүнүн формуласы:

Өтө кичине кадам+ Туруктуулук=Ылдамдуулук

-Күн сайын бир бет китеп окуу

-Күн сайын беш сөз жаттоо

-Күн сайын беш мин. видео көрүү

Демек, биз максаттарга жетүү үчүн кичине кадамдарды туруктуу жасасак кандай гана максат болбосун ийгиликке тез жетебиз.

Кайтарым байланыш. Рефлексия

Максаттар дарагы. Максаттар жазуу түрүндө болуусу шарт. Келгиле, балдар, максаттар дарагына стикерлерге максатыбызды жазып илебиз.

Үй тапшырмасы

Максатка жетүүнүн формуласын колдонуп, кыска мөөнөттүү жана узак мөөнөттүү максаттарыңарды бөлүп жазып, аны өз бөлмөңөргө илип койгула.

Сабактын корутунду этабы

Өтө кичине кадам+ Туруктуулук=Ылдамдуулук

Туура максат коюп, ийгиликке тез жетебиз! Сабакты ушул сөз менен аяктагым келип турат.