Аары менен кайың

21-февраль —  Эл аралык эне-тил  күнүнө карата класстык саат 

Соодонбекова Махабат, Ысык-Көл районунун Сары-Ой айылынын Нурдөөлөт ата атындагы мектебинин башталгыч классынын мугалими

Окуу саатынын максаты: окуучуларды коомчулук менен бирдикте окууга жана китепке болгон  сүйүүсүн арттыруу көркөм окууга машыктыруу, оң жана терс каармандарды ажыратып жана аны талдай билүүгө үйрөтүү. Окуучуларды жомок аркылуу жаныбарлар жаратылыш, адамдын табияты тууралуу маалыматтарды берүү.

Коомчулук, окуучу, мектеп байланышын арттыруу ата-энелердин өз          балдарын сабакка болгон жоопкерчилигин, мамилесин өстүрүү.

Сабактын жабдылышы: Сүрөттөр, макалдар, китепчелер, жомок каармандары.

Катышуучулар: 1-4-класстын  окуучулары, коомчулуктан чакырылган меймандар.

Сабактын башталышы:

Мугалим: жагымдуу маанай менен окуу саатын ачат.

Коомчулуктан келген конок менен тааныштыруу

Коомчулуктан келген конок: — Балдар, менин колумда кайсы гүл турат»?

-Байчечекей

-Келгиле, балдар, байчечекей гүлү жөнүндө ыр билесиңерби?

Окуучулар «Байчечекей» ырын жалпы ырдашат.

Жашыл дөңгө көктөмдө,

Жамгыр төгүп өткөндө.

Байчечекей гүл ачып,

Бажырайып өскөндө.

Байчечекей жап-жаш гүл,

Бажырайган аппак гүл.

Бажырайып суктанткан,

Балдар терген аппак гүл,

Бул ак гүлдү эл сүйөт.

Бул ак гүлдү жер сүйөт,

Бул гүл жерди кооздоп,

Бул гүл көңүл сергитет.

Мугалим: Азаматсыңар, бул гүл жөнүндө эмне билесиңер?

Окуучулар өз жоопторун айтышат.

-Мына, балдар, байчечекей гүлүнөн бизге бөбөктөр журналы тааныш. Балдар, билесиңерби, «Байчечекей» журналы кайсы жылдан бери чыгат, башкы редактору ким?

— Ооба, балдар, 1977-жыл, башкы редактору Токтосун Самудинов.

Коомчулуктан келген конок: Азаматсыңар, анда эмесе, балдар, «Байчечекей» журналынан «Аары менен кайың» жомогун окуп  бермекчимин.

Окуганга чейин суроо менен кайрылат. Аңгеме «Аары менен кайың» деп аталат. Балдар, жомок эмне жөнүндө болот деп ойлойсуңар?

Балдар  өз жоопторун айтышат

-Аарынын пайдалуулугун билесиңерби?

-Ооба, бал алабыз. Балдын бизге пайдасы көп.

-Ал эми кайын деген эмне?

Окуучулар өз ойлорун айтышат

— Ооба, балдар, жаратылышты көздүн карегиндей сакташыбыз керек.

Аары менен кайың

Бир аарыны шамал учуруп кетет. Талаа, токой, тоолордон өтүп, канчалаган токой-өзөндөр артта калат. Аары бир кезде жолунда турган бир чоң кайыңды көрөт.

 -Мындан ары эмне болот деп ойлойсуңар?

— Окуучулар өз жоопторун айтышат.

«Мына бул чоң кайыңга урунсам өлөмүн го» деп ойлонот да, ызылдаган үн салат:

-Жолумдан кет, акмак, картаң кайың! Мындай тур! Антпесең, тамырың менен кошо жулуп аламын!

-Эмне үчүн аары жинденди?

Ал канча кыйкырса да, кайың кыймылдабайт.

Кудай жалгап, аары кайыңга урунбай, анын эки жоон бутагынын дал ортосунан өтүп кетет.

 -Эмне үчүн кайың кыймылдабайт?

Окуучулар өзүлөрүнүн жообун айтышып, талкуу жүргүзүлөт.

Анан ал: -Айтпадым беле сага, акмак, картаң кайың! Уккан жок элең эми эмне болдуң? Тең ортоңдон бөлдүм да, кеттим! — деп бардык үнү менен ызылдаган экен.

Окугандан кийин суроолор берилет

1.Силерге аңгеме жактыбы? Келгиле ал жөнүндө сүйлөшөлү

2.Аары кайыңга туура мамиле кылдыбы?

3.Кандай ойлойсуңар, эмне үчүн кайың жооп айткан жок?

Окуучулар өз ойлорун айтышат

Талкуу жүргүзүлөт

Жыйынтыктоо

Окуучулар окуу саатынын  кайсы бөлүгүнүн көп жаккандыгын жазып же сүрөтүн тартат. Кааласа уккан аңгеме жөнүндө сүрөт тартат.

Сабакка активдуу катышкан окуучулар ар түрдүү белектер менен сыйланат.