БАЛДАРГА МЭЭРИМ ТӨККӨН КУРОРТ
- 18.01.2016
- 5
Ак-Суу курорту Кыргызстандын бардык областтарынан мүмкүнчүлүгү чектелген майып балдар үчүн жашоого үмүт жандырган дарылоо мекемеси болуп саналат. Анын союз учурунда салынып, көптөн бери каралбай келген үч кабаттуу имараты азыркы убакта четинен ондолуп ремонт болуп жатат. Жакын арада сууну тазалоочу жабдыктар салынып бүткөрүлөт.
Азыркы учурда Ак-Суу курортунда 130 баланы кабыл алып дарылай турган базасы бар. Бирок чынында бул жерге келип дарыланууга муктаж болгон балдар мындан да көп экени талашсыз.
Ошол эле учурда мүмкүнчүлүгү чектелген балдарга жетиштүү жардам көрсөтүү үчүн заманбап медициналык жабдуулар, аппараттар жетишпейт. Өкмөт жана жергиликтүү бийлик органдары бул медициналык мекемени реконструкциялап, материалдык-техникалык базасын чыңдоого жетиштүү каражат кароого көңүл бурушу зарыл.
Балдардын реабилитациялык ооруканасында башкы дарыгер болуп 1982-жылдан бери Байыш Бейшенбаев эмгектенет. Ал 1975-81-жылдары Ташкенттеги Орто Азия медицина институтун окуп бүтүргөн.
Байыш Бейшенбаев өзүнүн бейтаптарын өтө кылдаттык менен караган дарыгер. Анын кызматынын натыйжалуу болушуна дайыма өмүрлүк жубайы Чынара дем-күч берип турат. Ал дагы өз кесибин мыкты билген дарыгер.
Ак-Суу курортунда иштеп жаткан медициналык кызматкерлердин камкор мамилеси балдарды мээримге бөлөп турат. Мээрман айымдар Дамира менен Гульмиранын, укалоочу Мээримдин өз кесибине берилгени жана ишин так аткарганы оорулуу балдардын жакшы болуп кетишине чоң өбөлгө болууда.
Таалайбек Оролбаев, БГУнун студенти
Комментарии