ТАЛПЫНГАН ТАЛАНТТУУЛАР АЛДЫДА

Кыргыз Республикасынын  Президентинин  «Улуттук нарк жөнүндө» Жарлыгын, «Инсандын руханий адеп- ахлактуулугун өнүктүрүү жана дене тарбиясы» жөнүндөгү Концепциясын ишке ашыруу алкагында  «Балажан» республикалык эстетикалык тарбия берүү окуу-усулдук  борбору тарабынан  «Мен Кыргызстандык экендигиме сыймыктанам!» аттуу аймактар аралык сынактын Ош облустук туру Ош мамлекеттик педагогикалык университетинин базасында өттү.

Маалыматка ылайык, сынактын максаты  — жөндөмдүү, таланттуу жаш аткаруучулар менен сүрөткө шыктуу балдарды аныктоо жана колдоо, кыргыз маданиятын балдардын чыгармачылыгы аркылуу таанытуу, жайылтуу жана жаш муундардын ортосунда  достукту чындоо, аларга дем берүү болуп эсептелет. Бул иш-чарада райондордон женүүчү деп табылган 100дөн ашык таланттуу  окуучулар ыр, бий, улуттук аспаптарда ойноо жана сүрөт тартуу чеберчиликтери боюнча күч сынашты.

—  Окуучулардын таланттарын Бишкектен келген жана облусубуздан түзүлгөн кесипкөй адистер   баалашты. «Музыкалык аспапта ойноо» жанрынан  7-11 жаш категориясы боюнча  биринчи орунга Алай районунан Кылычбеков Эржан, 12-14 жаштар арасында Каныбекова Алина, 15- 17 жаш курактан Жүрдүмаматова Сезимай ээлесе, «Ыр — вокал» жанры боюнча  Ноокат районунан Калмаматова Малика, Кара-Кулжа районунан Сагынбаев Улан, Алай районунан Маликова Элеонора чыкты. «Бий-хореография» жанры боюнча Кара-Кулжа районунан Сооронбекова Биби — Айша, ортонку категориядан Өзгөн районунан Жумаева Айбийке,  Ош облустук балдардын чыгармачылык борборунун окуучусу  Акматова Элнура, Кара-Кулжа районунан Карыбекова Аяна ээледи. «Сүрөт тартуу чеберчилиги»  жанры боюнча Кара-Кулжа районунан Кожоева Марджана, Кара-Суу районунан  Абдурасулова Анара ээледи, — дейт Р.Назаров, Ош облустук балдардын чыгармачылык борборунун директору.

Ал эми  женүүчүлөр аталган  мектептин бүтүрүүчү таланттуу  окуучуларына  Ош мамлекеттик педагогикалык университетинин ректору Б.Б.Зулуев  музыка факультетинин бюджеттик бөлүмүнө  тастыкталган сертификаттарды тапшырды.

— 1-2-3- орунду камсыз кылган окуучулар ОБЧБнын дипломдору жана «Капитал- курулуш» компаниясы тарабынан баалуу белектерине ээ болушту. Мүмкүнчүлүктөн пайдаланып ОМПУнун ректору Б.Б.Зулуевге, «Капитал- курулуш» компаниясынын жетекчиси Арзыматов Бактиярга окуучулардын, устаттардын атынан ыраазычылык билдиребиз. Алыскы райондордон балдарын сүрөп келген ата-энелер менен устаттар сынак жагымдуу маанайда өткөнүн белгилешти. Облустук сынактын  жыйынтыгында   биринчи орунду камсыз кылган 12 окуучу  май айында республикалык сынакка катышып, Ош облусунун намысын коргошот, — дейт жетекчи.

Гүлнара АЛЫБАЕВА, “Кут Билим”