Студенттик илимий конференция

“Ала-Тоо” Эл аралык университетинде үчүнчү ирет “Gateway to the World of Science” студенттик илимий конференциясы болуп өттү.

Конференцияда лингвистика жана Педагогика кафедраларынын студенттери тарабынан даярдалган отузга жакын баяндама окулду. Алар окуу жайдын Thesis жана Fundamentals of Scientific Research курстарынын алкагында иштелип чыккан. Студенттер үч ай аралыгында илимий изилдөөлөрдүн методологиясын өздөштүрүп, сурамжылоолорду жүргүзүп, тексттерди жана социалдык медианы анализдеп, эмпирикалык маалыматтарды изилдешкен.

Баяндамаларда негизги көңүл университеттик чөйрөгө бурулган. Студенттердин медиакеректөөсү, сырткы келбет боюнча стандарттарды кабылдоосу жана университеттин буфетиндеги тамак-ашка болгон артыкчылыктары изилденген. Ошондой эле массалык маданиятка байланыштуу темалар талданган: “Бейиш эненин таманы алдында”, “Өлгөн акындар коому”, “Жан дүйнө”, “Табышмак” тасмаларынын сюжеттери, Адельдин чыгармачылыгы жана популярдуу маданияттагы антагонисттерге болгон кызыгуу. Кээ бир изилдөөлөр шаардык жашоо көйгөйлөрүнө арналган: жол кыймылынын маселелери, тез татымдын популярдуулугу, Kulikov брендине карата мамиле жана россиялыктардын Кыргызстанга көчүп келүү феномени, билим берүү тармагындагы интерактивдүү такталарды колдонуу жана баалоо системалары талкууланган.

Кыргызстандагы миграция маселелери, 2GIS, Pinduoduo, Yandex Go сыяктуу санарип кызматтар, пандемиянын тамактанууга жана ден соолукка тийгизген таасири сыяктуу темалар камтылды.
Конференциянын уюштуруу комитети, анын ичинде лингвистика кафедрасынын башчысы Кундуз Акимканова жана педагогика кафедрасынын башчысы Жылдыз Такенова, студенттердин изилдөөлөрүнүн жогорку деңгээлин белгилешти. Алдыңкы эмгектер камтылган илимий жыйнагын чыгаруу пландалууда.