Алп жазуучунун эстелиги мектептин алдында орнотулду

Ч. Айтматов атындагы №63 гимназияда залкар жазуучунун эстелигин ачуу жана бүтүрүүчүлөргө аттестат тапшыруу аземи болуп өттү. Эстеликти  №63 гимназиянын  “Ч.Айтматовдун чыгармалары боюнча мыкты билерман” олимпиадасынын жеңүүчүлөрү 10-б класстын окуучусу Султаналиев Эдил жана 9-б класстын окуучусу, мектептин президенти Бабаназаров Нурислам салтанаттуу ачышты.

2013-жылы 1-октябрда Бишкек шаарынын Билим берүү башкармалыгынын буйругу менен №63 гимназияга  Кыргыз Эл баатыры  Ч.Айтматовдун аты ыйгарылган болчу.

—  КР маданиятынын мыктысы жана Ч.Айтматовдун эл аралык сыйлыгынын лауреаты Марлен Бакачиев баласын мектепке берип жатканда ал бюстту бизге белек кылып тартуулаган эле, — дейт №63 гимназиянын директору Аида Давлетова.

Директордун айтымында, эстеликти скульптор эки жыл ичинде иштеген. Анын көлөмү 3 м. 10 см. Эстеликтин төрт капталында жазуучунун  “Жаныбарым, Гүлсары!”, “Ак кеме”, “Жамийля” жана “Биринчи мугалим” чыгармаларынан эпизоддор чегилген.

—  Бийик гуманизмди чагылдырган мындай эстеликтин тарбиялык таасири зор.  Эстеликти орнотуу иш-чарасына жардам көрсөткөн “Алтын мектебим” уюштуруу бөлүмүнүн директору К. Кыдырмышевге жана Д. Токтоналиевага, А.Осмонкуловага, “МАЭК-СТРОЙ” ЖЧК курулуш компаниясынын директору Маралбаевге жана анын орун басары Н. Жакиевге  терең ыраазычылык билдирем. Эстеликтин архитектуралык-пландаштыруу документтерин биздин гимназиянын  бүтүрүүчүсү Алыбаев Медер даярдады,  – дейт мектеп жетекчиси.

Иш-чаранын соңунда  мугалимдерге, жакшы окуган бүтүрүүчүлөргө “Ч.Айтматовдун философиясы” аттуу китеп жана мактоо баракчалары, ошондой эле  бүтүрүүчүлөргө орто билим туурасындагы аттестат тапшырылды.

Айтмакчы, аталган иш-чарага Жогорку Кеңештин депутаты Д. Бекешев, жазуучунун уулу Аскар Айтматов, жазуучу А.Кенжебаев жана эстеликти орнотууга жардам көрсөткөн “Алтын мектебим” уюштуруу бөлүмү, “МАЭК-СТРОЙ” ЖЧК курулуш компаниясынын өкүлдөрү, коноктор жана бүтүрүүчүлөрдүн ата-энелери катышты.

Мафтуна Исраилова,

Ж.Баласагын атындагы КУУнун журналистика факультетинин 2-курсунун студенти.