Финансылык коопсуздук боюнча дүйнөлүк таймашта кыргызстандык билимдүү жаштар жеңишке жетти

Россиянын Красноярск шаарында өткөн Финансылык коопсуздук боюнча V Эл аралык олимпиаданын финалында кыргызстандык студенттер жана мектеп окуучулары жогорку көрсөткүчтөрдү көрсөтүштү. 40тан ашуун өлкөдөн келген 600дөн ашуун катышуучу арасында өтө атаандаштык шартында өткөн бул иш-чарада Кыргызстандын өкүлдөрү үч негизги номинацияда байгелүү орундарды камсыз кылышты.

Кыргызстандын атынан Мамлекеттик башкаруу академиясынын, Кыргыз улуттук университетинин, Кыргыз мамлекеттик техникалык университетинин, Бишкек гуманитардык университетинин, КРСУнун, Кыргыз экономикалык университетинин студенттери жана атайын республикалык тандоонун жыйынтыгында тандалган төрт мектеп окуучусу катышты.

Олимпиаданын жыйынтыгында төмөнкү катышуучулар өз багыттарында жеңүүчү болушту:

Азим Жумаков – “Эл аралык мамилелер” номинациясы боюнча жеңүүчү;

Алиса Семенова – “Экономикалык коопсуздук” номинациясы боюнча жеңүүчү;

Дмитрий Кошевой – “Маалыматтык коопсуздук” номинациясы боюнча жеңүүчү.

Мындан тышкары, Бишкек шаарындагы №1 мектептин окуучусу Руслан Байсалов КМШ өлкөлөрүнүн арасында биринчи орунду багынтып, ноутбук менен сыйланды.

Олимпиаданын алкагында катышуучулар панелдик талкууларга, мастер-класстарга жана спорттук иш-чараларга катышышты. Алар финалга чейин Финансылык коопсуздук боюнча эл аралык жайкы мектептин алкагында атайын даярдыктан өтүшкөн.

Мындан сырткары, иш-чаранын жүрүшүндө Мадагаскар Республикасынын өкүлдөрү менен финансылык коопсуздук жаатында билим берүү программалары боюнча кызматташтык макулдашылды.

Бул жетишкендик – Кыргызстандын билим берүү системасынын өсүп жаткан сапатынын жана жаш муундардын глобалдык маселелер боюнча жигердүү катышуусунун далили болуп саналат.

(БК)